الدليل الشامل لشراء لابتوب مستعمل في 2025

بتفكر تشتري لابتوب مستعمل بس قلقان من العيوب الخفية؟ في الدليل ده هنعلمك إزاي تفحص الجهاز زي الخبراء بالظبط. 7 خطوات بسيطة هتخليك تشتري وأنت مطمن وتتجنب أي مشاكل.

شراء لابتوب مستعمل هو واحد من أذكى القرارات اللي ممكن تاخدها لو عايز مواصفات قوية بسعر معقول. لكن السوق مليان أجهزة، والفرق بين صفقة ممتازة ومقلب كبير بيكون في التفاصيل الصغيرة. علشان كده في Target Store، وبما إن دي شغلتنا الأساسية، حبينا نقدملك الدليل الكامل اللي هيخليك تختار اللابتوب المستعمل الجاي بتاعك وإنت خبير.

🖥️ 1. الفحص الظاهري (الجسم والمفاصل)

أول حاجة تبص عليها بعينك. زي ما بنقول "الجواب بيبان من عنوانه". ركز على:

• الكسور والشروخ: بص كويس على كل حتة في جسم اللابتوب، خصوصاً الأركان والحروف. أي كسر واضح ممكن يكون معناه إن الجهاز وقع وقعة جامدة.
• المفاصل (Hinges): افتح شاشة اللابتوب واقفله كذا مرة بالراحة. هل الشاشة ثابتة ومبتتهزش؟ لو حسيت إن المفصلة "سايبة" أو بتعمل صوت، دي علامة مش كويسة وممكن تتكسر مع الوقت.
• المنافذ (Ports): قرب عينك من كل فتحة (USB, HDMI, شاحن...). هل شكلها سليم ونضيف؟ ولا فيها سنون معووجة، أو تراب كتير لازق، أو لا قدر الله صدأ؟ منفذ بايظ ممكن يكلفك كتير عشان تصلحه.

💻 2. فحص الشاشة (عيونك أهم حاجة)

الشاشة هي أكتر حاجة هتتعامل معاها. شغل الجهاز وافتح صفحة بيضا خالص (زي ملف Notepad فاضي وكبره على الشاشة كلها)، وبعدين صفحة سودة خالص. دور على:

• الـ Dead Pixels (النقط الميتة): دي بتبان نقط صغيرة سودة أو ملونة (أحمر، أخضر، أزرق) مبتتغيرش أبداً مهما غيرت الخلفية. بتبان أوضح على الخلفية البيضا. نقطة أو اتنين لحد 5 نقط ممكن تعدي، لكن أكتر من كده لأ.
• البقع البيضا أو تسريب الإضاءة (Backlight Bleed): دي بتبان زي نور أبيض زيادة طالع من جوانب الشاشة، خصوصاً على الخلفية السودة. لو خفيف وموجود في الأركان بس ممكن يكون مقبول، لكن لو كتير وواضح يبقى الشاشة دي مش كويسة.

⌨️ 3. الكيبورد والـ Touchpad (تجربة كل مفتاح)

متتكسفش تجرب كل حاجة.

• الكيبورد: افتح أي ملف كتابة (Notepad مثلاً) وجرب تكتب كل زرار موجود في الكيبورد حرفياً. شوف هل كل الزراير بتستجيب كويس؟ هل فيه زرار بيعلق أو محتاج تدوس عليه جامد؟ هل الإضاءة الخلفية للكيبورد (لو موجودة) شغالة في كل الزراير؟
• الـ Touchpad (لوحة اللمس): جرب تحرك الماوس في كل حتة على الشاشة. جرب تعمل كليك يمين وكليك شمال. جرب تعمل Scroll بصباعين (لو بتدعم). لازم تكون مستجيبة وسلسة.

🔋 4. البطارية (أهم اختبار)

لابتوب ببطارية ميتة بقى عامل زي الكمبيوتر العادي. لازم تختبرها كويس:

• الاختبار السريع: افصل الشاحن وسيب اللابتوب شغال بيعرض فيديو يوتيوب لمدة ربع ساعة مثلاً. شوف نسبة الشحن نزلت كام في المية. لو نزلت أكتر من 15-20% في الربع ساعة دي، يبقى البطارية غالباً ضعيفة.
• الاختبار الدقيق: (لو معاك وقت أو بتشتري من مكان ثقة) افتح الـ Command Prompt (CMD) كـ Administrator واكتب الأمر powercfg /batteryreport ودوس Enter. هيعملك ملف HTML على جهازك فيه تقرير كامل عن صحة البطارية والفرق بين سعتها الأصلية (Design Capacity) وسعتها الحالية (Full Charge Capacity). كل ما الرقمين كانوا قريبين من بعض، كانت البطارية أحسن.

⚙️ 5. المواصفات الفعلية (التأكد من اللي بتدفع عشانه)

متصدقش الكلام أو اللزقة بس. لازم تتأكد بنفسك:

• دوس كليك يمين على أيقونة "This PC" أو "My Computer" واختار Properties. هتلاقي مكتوب نوع المعالج (Processor) وسعة الرامات (RAM). قارنهم باللي البياع قالهولك.
• عشان تعرف نوع الهارد (SSD ولا HDD) وحالته، نزل برنامج مجاني اسمه CrystalDiskInfo. شغله وهو هيقولك حالة الهارد Good ولا لأ وعدد ساعات تشغيله (كل ما قلت كان أحسن). الـ SSD أسرع بكتير من الـ HDD العادي.

🛠️ 5.5. هدية مني ليك (برامج لازم تجربها)

الفحص الظاهري والمواصفات مهمين، لكن عشان تطمن إن الجهاز هيستحمل الشغل التقيل (خصوصاً لو هتلعب عليه أو تشغل برامج تصميم)، لازم نعمله شوية اختبارات ضغط (Stress Tests) باستخدام برامج متخصصة. دي أشهر وأقوى البرامج المجانية اللي بنستخدمها في Target Store:

• FurMark: ده مخصص لـ "حرق" كارت الشاشة (GPU). شغله لمدة 3-5 دقايق وراقب حرارة كارت الشاشة (باستخدام HWInfo). لو الحرارة عدت الـ 85-90 درجة أو الجهاز فصل أو الشاشة طلعت ألوان غريبة، يبقى في مشكلة في تبريد كارت الشاشة.
  تحميل FurMark من الموقع الرسمي

• HWInfo (Hardware Info): ده أهم برنامج مراقبة لازم يكون عندك. بيعرضلك كل تفاصيل الجهاز وحرارة كل قطعة (المعالج، كارت الشاشة، الهارد) بشكل لحظي ودقيق. خليه شغال في الخلفية وإنت بتعمل اختبارات الضغط التانية.
  تحميل HWInfo من الموقع الرسمي

• CrystalDiskInfo: زي ما قلنا قبل كده، ده متخصص في صحة الهارد ديسك (HDD أو SSD). بيوريك حالته وعدد ساعات تشغيله وأي أخطاء متسجلة عليه. لازم تكون الحالة "Good".
  تحميل CrystalDiskInfo من الموقع الرسمي

• Prime95: ده البرنامج الكلاسيكي لضغط واختبار استقرار المعالج (CPU). شغله (اختار وضع الـ Blend test) لمدة 3-5 دقيقة وراقب حرارة المعالج (باستخدام HWInfo). لو الحرارة عالية جداً (فوق 90-95 درجة) أو الجهاز عمل ريستارت، ممكن تكون في مشكلة في تبريد المعالج.
  تحميل Prime95 من الموقع الرسمي

🌡️🔊 6. اختبار الحرارة والصوت

شغل فيديو بجودة عالية أو لعبة خفيفة لمدة 10-15 دقيقة عشان الجهاز يسخن شوية:

• الصوت: علي الصوت واسمع كويس. هل الصوت واضح ونقي ولا فيه "خروشة" أو "زنة"؟ جرب كمان توصل سماعة في مدخل السماعات وتتأكد إنه شغال.
• الحرارة والمراوح: حط إيدك على أماكن خروج الهوا من اللابتوب. هل الهوا سخن زيادة عن اللزوم؟ هل صوت المراوح عالي جداً ومزعج؟ سخونة عالية أو صوت مراوح غريب ممكن يكون مؤشر لمشكلة في نظام التبريد.

✅ 7. الضمان (الأمان أهم من السعر)

دي أهم نصيحة ليك. مهما كان اللابتوب شكله حلو وسعره رخيص، لو هتشتريه من حد مش مضمون ومن غير أي فترة ضمان (حتى لو أسبوع واحد بس تختبر فيه براحتك)، يبقى بتخاطر بفلوسك. اللابتوب المستعمل ممكن يكون فيه عيوب مش بتبان غير مع الاستخدام. اشتري دايماً من مكان بيديلك فترة ضمان حقيقية تقدر ترجعله فيها لو حصل أي مشكلة.